БАТКЕН ШААРЫНДА АЙТ НАМАЗЫ БОРБОРДУК СТАДИОНДО ОКУЛДУ

Бүгүн, Баткен шаарынын борбордук стадионунда миндеген шаар тургундарынын жана конокторунун катышуусунда Айт намазы окулду.

Облус борбору Баткен шаарында окулган Айт намазына КРнын Президентинин Баткен облусундагы өкүлү Абдикарим Алимбаев, Ислам университетинин ректору диний аалым Абдишүкүр Нарматов, Баткен шаарынын мэри Имамназар Бурканов, жергиликтүү бийлик өкүлдөрү жана облусутук, шаардык мусулмандарынын казылары катышып, жалпы момун мусулмандарды Ыйык Курман айт майрамдары менен куттуктады.

Айт намазын окуу үчун келген мусулман бир туугандарга диний аалым, Ислам университетинин ректору Абдишүкүр Нарматов Курман айт майрамынын өзгөчөлүгү боюнча баян кылып, жалпы элибизге жакшы дубаларын кылышты.

Ошондой эле айт намазынын алдында Баткен шаарынын мэри Имамназар Бурканов жалпы шаар тургундарын жана мусулман бир туугандарды Курман айт майрамдары менен куттуктап, бул майрамда таарынгандар бирин-бири кечирип, жакындарынан кабар алып, муктажга жардам берип, чыныгы мусулманга тиешелүү болгон кечиримдүүлүктүн, кайрымдуулуктун жана боорукерликтин үлгүсүн көрсөткөндүгу үчун башка майрамдардан өзгөчө экендигин белгиледи.

Белгилей кетсек, Курман айт майрамынын урматына «Адеп Башаты» коомдук уюмунун демилгеси жана шаар тургундарынын колдоосу менен курмандык союулуп, шаардагы муктаж жарандарга таратылып берилди.

УРМАТТУУ МУСУЛМАН БИР ТУУГАНДАР!

ЫЙЫК КУРМАН АЙТ МАЙРАМЫҢЫЗДАР МААРЕК БОЛСУН!

Баткен шаардык мэриясынын маалымат кызматы.