МУГАЛИМДЕРДИН ПЕДАГОГИКАЛЫК КЕҢЕШМЕСИ ӨТКӨРҮЛДҮ

     Баткен шаарында «Сапаттуу билим берүү жана руханий адеп-ахлактык тарбия — өлкөнүн өнүгүүсүнүн негизи» аталышындагы мугалимдердин педагогикалык кеңешмеси өткөрүлдү.

Ага КРнын Президентинин Баткен облусундагы өкүлчүлүгүнүн социалдык мониторинг жана өнүктүрүү бөлүмүнүн башчысы Сейитмурат Калыков, Баткен шаардык мэриясынын вице-мэри Маматисаев Мансурбек, Баткен облустук билим берүү усулдук борборунун жетекчиси Осмон Эркебаев, Баткен шаардык билим берүү бөлүмүнүн башчысы Абдила Ахматбеков, шаардагы билим берүү мекемелеринин жетекчилери жана мугалимдер катышты.

Кеңешмеде билим берүү бөлүмүнүн башчысы Абдила Ахматбеков окуу жылы ичинде аткарылган иштер, жетишкен ийгиликтер, алдыдагы пландар тууралуу баяндама жасады.

Ага улай Минавар Таштемирова эжеке «Санарип педагогика» боюнча, ал эми Канышай Галбаева эжеке «Кыргыз тилин өнүктүрүү» боюнча жарыш сөзгө чыгышты.

Вице-мэр Маматисаев Мансурбек билим берүү кызматкерлерин жаңы окуу жылынын башталышы менен куттуктап, шаарда билим берүү тармагына өзгөчө көңүл бурулуп келе жаткандыгын белгиледи.

-«Баткен шаарынын мэриясы билим берүү кызматкерлерин ар тараптан колдоп келет жана колдоого дайым даяр. Жергиликтүү бюджеттин эсебинен мугалимдерге коммуналдык төлөмдөр үчүн жеңилдиктер жыл сайын каралат. Быйыл мектептерди оңдоп-түзөө иштерине шаардык бюджеттен 200 миң сом бөлүнүп берилген. Мындан тышкары С.Огата орто мектебине кошумча 4 кааналуу имарат куруп берүү үчүн жергиликтүү бюджеттен 7 млн. сом акча каражыланган. Республикалык, облустук олимпиада турларында, «Манас таануу» интеллектуалдык сынагында, «Илим жана техника» сынактарында ийгилик жараткан окуучуларга жана мугалимдерине, мыкты бүтүрүүчүлөргө мэрия тарабынан жыл сайын мотивация берүү максатында акчалай сыйлыктар берилет. Ошондой эле жакынкы аралыкта курулушу бүткөрүлгөн имараттарды пайдалануга беребиз», — деди М.Маматисаев.

Кеңешменин жүрүшүндө вице-мэр М.Маматисаев көп жыл эмгектенген, мыкты көрсөткүчтөрдү көрсөткөн билим берүүнун кызматкерлерине Ардак грамота жана Алкыш баракчаларды тапшырды.

Ал эми Баткен шаардык билим берүү бөлүмү жана Билим берүү кызматкерлеринин профсоюзунун Баткен шаардык комитети мугалимдерди Ардак грамота, ыраазычылык баракча, акчалай сыйлыктар жана баалуу белектер менен сыйлады.

Шаардык билим берүү бөлүмүнүн башчысы, меценат Абдила Ахматбеков көп жыл эмгектенген мугалимдерге өзүнүн сыйлыгын тапшырды. Мындай жөрөлгө жыл сайын аткарылып келет. Баткен шаардык билим берүү бөлүмүнүн башчысы Абдила Ахматбеков билим берүү тармагына кошкон салымы үчүн 2015-жылы «Жылдын мыкты меценаты» деп таанылган.