СОЮЗДАН КАЛГАН АСЫЛ ТУКУМ ЭЧКИ ЗАВОДУ ӨНҮГҮҮНҮН ЖОЛУНДА

Бүгүнкү күндө элдик чарбадагы эчкинин саны 1800 жетип, Баткен шаарынын 14 тургуну туруктуу жумуш оруну менен камсыз болгон.

Учурда чарбада кыргыз уяң жүндүү эчкилердин тыбытын тароо иштери кызуу жүрүп, өнөктүккө 50дөн ашуун жарандарыбыз тартылган. Убактылуу эмгектенип жаткан шаар тургандарынын күнүмдүк тапкан кирешеси орточо эсеп менен 1500 сомду түздү. Ошондой эле жумушчулардын келип кетүүсү үчүн унаа каттамы жана ысык тамак уюштурулган.

Чарбанын жетекчиси Амиракулов Калыбай Саттаровичтин жана эмгек жамаатынын аракети менен чарбанын кирешеси көбөйүп, жумушчулардын эмгек акыларына, мамлекеттик төлөмдөргө болгон карыздар жоюлуп, чарбалык иштерди жандандыруу аракети колго алынууда. Андан сырткары шаарыбызда курулуп жаткан социалдык мекемелерге жана муктаж жарандарыбызга чарбанын мүмкүнчүлүгүнө жараша колдоолор берилип келүүдө.