Эгемендүүлүктүн 30 жылдыгына карата Баткен шаарындагы жаңыдан курулган 36 үйдүн жашоочулары өзгөчө кубанычка бөлөнүштү.

Эгемендүүлүктүн 30 жылдыгына карата Баткен шаарындагы жаңыдан курулган 36 үйдүн дагы жашоочулары өзгөчө кубанычка бөлөнүштү. Президенттин жеке көзөмөлү менен кыска аралыкта пайдаланууга берилген бул үйлөр чек ара жаңжалдарында курман болгондордун үй бүлөлөрү үчүн курулган. Сапаттуу жана бардык шарттары бар үйлөрдү куруп берген “Ихлас” жана СМА” групп курулуш компанияларынын эмгек жамаатына Президент ыраазычылык билдирди. Бул турак-жайларды куруу үчүн Чет-Булак кварталынан мэрия тарабынан 5 га жер тилкеси бөлүнүп берилген.

Бүгүн үйлөрдүн ачкычтарын тапшырууда шейит кеткен маркумдар эскерилип куран окулду. Маркумдардын жакындарына дагы бир ирет көңүл айтып жатып Президент Садыр Жапаров, бул 36 үй трагедиялуу курман болгондордун үй-бүлөсүнө колдоо максатында курулуп жатканын белгилеп, келечекте балдар өз мекенин сүйгөн уул кыздардан болуп чоңоюшун айтты.

— «Элим менен кошо менин да жүрөгүм канап турат. Кыргыз-тажик чек арасында орун алган окуяда алар кыргыз мамлекетинин бүтүндүгүн көздүн карегиндей сактоо деген ыйык милдетти көкүрөгүнөн чыгарбай, эл жерди коргойм деп жан беришти. Ооба, кандай гана колдоолорду көрсөтпөйлү орду толгус мындай оор жоготуунун орду толбойт. Эр азаматтарыбыздын ата-энеси, бир туугандары, жакындары, жубайы, балдары эл көзүнө жылмайганы аракет кылганы менен ичтен сызып, аттиң деп арман кылып турушат»-деди Садыр Жапаров.

Белгилей кетсек үйлөр заманбап курулган, кышында жылуу, жайында салкын болот. Бул шаарчанын ичинде балдар бакчасы, ФАП, эс алуу багын куруп берүү да пландалууда. Учурда шаарчанын көчөлөрүнө асфальт төшөлүп, жарыктандыруу жана коммуникация толук орнотулган.